ROXAS CITY — Ginpasakaan na sang panumbungon nga murder sa Office of the Ombudsman sang pamilya Borres ang tatlo ka mga opisyal sang 61st Infantry Battalion sang Philippine Army may kaangtanan sa kamatayon sang duha ka ginaalegar mga katapo sang New People’s Army nga naka-engkwentro sang militar sa Sitio Maknoy, Barangay Jebaca sa banwa sang Maayon.
Suno kay Mr. Reylan Vergara, secretary general sang grupo nga Karapatan, ginpasakaan sang panumbungon sanday 61st IB commander LTC Leonardo Peña, Maj. Alan Mangaser kag Sgt. Jeffrey Belarmino.
Ginpahayag ni Vergara nga ginbuligan nila ang pamilya sang mga napatay nga sanday Ian kag Lorendo Borres nga mapasaka ang panumbungon agud maagum nila ang hustisya sa kamatayon sang magpaka-isa nga suno sa ila ang mga sibilyan kag indi rebelde.
Nagserbe nga mga complainants sa amo nga panumbungon ang mga asawa sang mga napatay nga sanday Analie kag Marjorie Borres.
Suno pa kay Vergara, nakasandig na sa Ombudsman ang pagtul-id kun kinahanglan pa nga mapasakaan sang kaso administratibo ang mga opisyal.
Magluwas sa Ombudsman ginpalab-ot naman nila ang reklamo sa igtalupangod sang Commission on Human Rights.
Gindugang pa ni Vergara nga maathag nga paglapas sa International Humanitarian Law ang ginhimo sang militar batuk sa magpaka-isa nga Borres.
Ginpatpat ni Vergara ang mga paglapas sang militar kaangay sang kapaslawan sang mga ini nga makapangusisa sang matuod nga identity sang mag napatay nga suno sa ila pamilya ang mga sibilyan kag indi rebelde.
Ginpakamalaut man sang grupo ang ginhimo nga pagpabaya sang militar sa bangkay sang duha nga nagtenir pa sa latagon sang kapin 48 oras antes nadala sa punerarya.
Ginkadismaya man nila ang padayon nga pagpalapta sang militar sang impormasyon nga mga katapo sang rebelde nga New People’s Army ang mga napatay nga Borres.
Kasunod sini, ginpanawagan man ni Vergara ang pag pull-out na sang militar sang ila tropa sa mga nabukid nga kabaranggayan agud nga wala na sang may mahalitan nga mga sibilyan sa ila inaway sang rebelde nga grupo.
Mahibaluan nga napatay ang magpaka-isa nga Borres sa isa ka engkwentro batuk sa militar sang nakaligad nga bulan.
Una naman nga ginpanindugan sang militar nga lehitimo nga engkwentro ang nagluntad kag kilala nga mga rebelde ang nagkalamatay, kabaliskaran sang pahayag sang ila mga pamilya.
