ROXAS CITY – Naalarma ang mga residente sang Barangay Olutayan sa Roxas City matapos nag-abot sa ila lugar ang tatlo ka mga lalaki nga lunsay nakasuksok sang bonnet kag may bitbit nga dalagku nga mga bag.
Nabalaka lamang ang asawa sang barangay kagawad nga napamangkutan sang nasambit nga mga lalaki bangud nakita sini ang mabug-at nga dala nga bag sang tatlo nga nagpamangkot pa sa iya kun may hotel sa ila nga barangay.
Suno sa ginang nga indi bisaya ukon hiligaynon ang lengguwahe sang tatlo ka mga lalaki kundi kasubong nga gikan sa Mindanao.
Wala man nalikawan nga kulbaan sang ginang bangud nakita sini nga nagasuksok sang malong ang mga lalaki kag indi makilala ang nawong bangud naka-bonnet ang mga ini kag mata lamang ang makita.
Gilayon nga gin-imporma sang ginang ang mga katapu sang Philippine Coastguard angut sa presensiya sang tatlo apang antes pa sila nakalab-ot sa lugar, nakabiya na ang mga lalaki sakay sa ila bangka nga nagaduag yellow kag puti.
