ROXAS CITY – Nag-angkon sang kapilasan ang sakay sang delivery truck matapos ang nagluntad nga aksidente sa Sitio Binalabag, Barangay Sibaguan, Roxas City.
Ginkilala ang mga biktima nga sanday Ronilo Meliton, 52-anyos driver sang truck, residente sang nasambit nga barangay, Mark John Villaruz, 23-anyos residente sang Brgy. Punta Tabuc, Roxas City kag Peter John Villaruz residente sang banwa sang Sigma nga lunsay mga pahinante.
Sa pagpakig-angut sang Bombo Radyo sa driver sang truck, ginpahayag sini nga magapadulong kuntani sila sa syudad sang Iloilo agud magpa-refill sang ila mga oxygen tanks nga karga.
Apang, sang ini ang nagamaneho hinali nalang nag-lock ang iya manibela rason nga nadulaan ini sang kontrol kag aksidente nga bumunggo sa isa ka puluy-an nga nahamtang malapit sa karsada.
Maswerte nga wala sang tawo sa amu nga balay kag wala sang may nadalahig sa amu nga aksidente.
Madasig naman nga ginpadangat sa ospital sa syudad sang Roxas ang mga biktima agud madapatan sang nagakaigo nga pagbulong.
Sa karun, padayon pa ang imbestigasyon sang mga kapulisan sa nasambit nga insidente.
