DAVAO CITY – Mangin mabudlay ang dalan nga paga-usuyon sang Hercor College Junior Jaguars nga nagatiglawas sa WVRAA Basketball Secondary Boys agud malab-ot ang ila handum nga makuha ang Gold Medal sa Palarong Pambansa 2019.
Ini matapos nga ginlutos sang powerhouse nga Ilocos Region ang WVRAA cagers sa score nga 108-83 sa ila Bracket D match nga ginhiwat sa University of Southeastern Philippines kaina sang hapon.
Bangud sini, makasumpong buwas sang WVRAA ang defending champion nga NCR para sa quarterfinals match sang isa sa mga ginakalangkagan nga event sang Palaro.
Mahibaluan nga nakasiguro sang pwesto sa quarterfinals ang WVRAA matapos nga ginlutos nila ang MIMAROPA, NMRAA, kag SRAA sa ila Bracket D matches.
Apang wala na ginpaporma sang Ilocos Region nga may yara man sang matinlo nga 3-0 win-loss slate ang WVRAA agud maghari sa ila nga bracket.
Sa pihak nga bahin, nagtapos sa ikawalo nga puwesto ang Capizeño billiards protege nga si Elijah Noli “Boy Wonder” Alvarez sang ini ang ginlutos sang cue artist naggikan sa CAR sa quarterfinals sang Billiards Secondary Boys 8-ball tournament.
Apang tinguhaan sini nga makabawi buwas nga adlaw sa 9-ball tournament agud makadala pauli sang medalya para sa WVRAA.
Ini ang labing una nga kampanya sang 14-anyos nga Grade 8 student nga si Alvarez sa Palarong Pambansa.
