Nagpakigbahin sang mga accomplishment sang ila talatapan ang 3rd Infantry Division sang Philippine Army sang tuig 2025.
Sa interview sang Bombo Radyo kay Captain Jessie Jun Ebalan, Chief sang 3rd Infantry Division Public Affairs Office, iya ginpahayag nga ang ini nga mga accomplishment ang bunga sang pagbinuligay sang tanan nga katapo sang ila talatapan agud mapapas ang bahin sang New People’s Army sa Negros Island Region, Panay Island kag Central Visayas.
Suno sa iya, may yara sang 52 ka mga miyembro sang New People’s Army ang na-neutralized kun sa diin 33 diri ang boluntaryo nga nag surrender.
May yara man sang 82 ka mga armas ang ila nga nakumpiska sa bilog nga tuig 2025.
Samtang, ang pinakadaku nga accomplishment sang ila talatapan amo ang pagdismantle sang Regional Sentro de Gravedad Madia-as sang Komiteng Rehiyon- Panay.
Apisar may yara pa sang nabilin nga mga miyembro, nagapabilin nga insignificant ukon indi na makahangawa ang amo nga grupo bangud gamay na lang ang ila sini mga miyembro.
Pahayag pa niya, nagataas ang numero sang mga miyembro sang New People’s Army nga naga surrender kag nagabalik sa sabak sang gobyerno bangud mas gusto na nila magpangabuhi sang matawhay upod ang ila sini mga pamilya.
Dugang pa sang natungdan, magapadayon ang ila nga pagserbisyo agud mapabilin ang kalinong kag katawhay sang palibot.
