Wala pa matumod ang nahamtangan sang Apat (4) ka Pinoy sa Myanmar matapos ang mabaskog nga 7.7-magnitude nga linog sang Biernes, Marso 28 suno sa isa ka opisyal sang Department of Foreign Affairs (DFA).
Sa isa ka interview kay DFA Undersecretary Eduardo de Vega, iya ginpahayag nga duha sa mga nadula nga mga Pinoy ang mag-asawa, nagapuyo sila sa building nga narumpag bangud sang linog.
Ginkumpirmar man sang ahensya nga ang tanan nga missing nga mga Pilipino ang lunsay mga propesyonal, lakip na ang mga manunudlo kag office workers.
Wala naman sang may ginreport nga Pinoy nga napilasan sa Thailand, sa diin nabatyagan man ang mabaskog nga pagtay-og.
Dugang pa ni De Vega nga nagapangayo sang bulig ang Myanmar sa iban nga pungsod bangud sini nga Domingo, Marso 30, nagsaka na sa masobra 1,600 ang napatay.
Sa isa ka post sa Facebook, ginpahayag sang Philippine Embassy sa Yangon nga padayon ang ila pagpatigayon sang welfare checks para sa mga apektado nga Pinoy. Nagpagwa man sila sang paandam angut sa posible aftershocks kag nagpabutyag sang ila kahandaan nga maghatag sang bulig kag suporta.
Samtang, plano naman sang embahada nga magpadala sang team sa Mandalay agud magpatigayon sang on-the-ground assessment kag direkta nga welfare checks. Magahatag man sila sang bulig kaangay sang basic needs kag posible ruta sang evacuation ukon repatriation.
Para sa mga emerhensya, mahimo ka magtawag sa Embahada paagi sa Assistance-to-National hotline +95 998 521 0991 ukon sa opisyal nga Embahada sang Pilipinas sa Myanmar Facebook Messenger.
