Wala nagakabalaka ang kampo ni Vice President Sara Duterte sa mangin testimonya ni Ramil Madriaga sa impeachment hearing nga pagahiwaton subong nga semamna.
Suno kay Atty. Salvador Panelo, lunsay kabutigan ang mga nauna nga pahayag ni Madriaga kag sa tion nga madala sa nagakaigo nga forum ang impeachment kaangay sang Senado, mapamatud-an nga peke kag indi matuod ang iya mga pahayag.
Dugang pa ni Panelo nga ang ginakabalak-an lamang sang kampo ni Duterte nga basi magpati ang komitiba sa sini nga mga kabutigan ilabi pa nga ang mga katapo sang House Justice Committee lunsay mga kontra sa pulitika ni Duterte.
Samtang, sa mandu sang Manila Regional Trial Court sang Miyerkules, ginpahanugutan sang korte si Madriaga nga magtambong sa palaabuton nga House of Representatives hearing agud istoryahan ang impeachment batok kay VP Sara.
Nakasaad sa mandu nga apisar ginapahanugutan si Madriaga nga makatambong sa hearing, kinahanglan nga may yara ini sang nagakaigo nga jail escort kag pasugtan lamang halin alas 8:00 sang aga tubtub alas 5:00 sang hapon.
