ROXAS CITY – Pilason ang 42 anyos nga lalaki matapos nga ginlabu sa Sitio San Vicente, Barangay Lonoy, Roxas City.
Ginkilala ang biktima nga si Mark Beluso, residente sang nasambit man nga lugar.
Base sa inisyal nga impormasyon nga nakuha sang Bombo Radyo, nagpauli ang biktima kag nagapahuway na kuntani sa ila balay sang nabatian nga may nagakinagamo sa guwa.
Sa iya pag-tsekyar, nakita sini ang kinagamo sa tunga sang suspek nga si Fernando Aporta kag iban pa nga residente.
Naguwa ang biktima kag iya ini ginsaway apang sang siya ang nagpatunga, ginlabu ini sang suspek rason nga siya ang napilasan sa natuo nga kamot.
Gilayon nga ginpadapatan sang nagakaigo nga pagbulong ang biktima samtang madasig naman nga nagpalagyo ang suspek matapos ang insidente.
