Nakaangkon sang ayuda ang 467 ka mga rehistrado nga mangingisda sa Roxas City sa idalom sang Presidential Assistance for Farmers and Fisherfolk Program (PAFFP) nga ginapatuman sang Bureau of Fisheries and Aquatic Resources (BFAR) kag Department of Agriculture (DA).
Ginpatigayon ang pagpanagtag sang ayuda subong nga adlaw bilang kabahin sang programa sang gobyerno nga nagasuporta sa pangabuyanan sang mga mangunguma kag mangingisda.
Suno sa BFAR kag DA, ang pinansyal nga bulig ginahatag sa mga rehistrado nga benepisyaryo agud mabuligan sila sa pag-atubang sang padayon nga pagsaka sang presyo sang mga kinahanglanon sa pagpangisda kag pagpanguma, lakip na ang fertilizer, krudo kag iban pa nga agricultural kag fisheries inputs.
Ginalauman sang mga otoridad nga paagi sa sini nga programa, maibanan ang pinansyal nga kabudlayan sang mga benepisyaryo kag mapadayon nila ang ila pangabuyanan bisan nagataas ang gasto sa produksyon.
