PANAY, CAPIZ – Patay na sang nasapwan ang 47 anyos nga mangunguma sa sulod sang ila balay sa Barangay Libon, Panay, Capiz.
Ang biktima ang ginkilala nga si Felix Barrio, residente sang nasambit man nga barangay.
Base sa impormasyon nga nakuha sang Bombo Radyo sa Panay Municipal Police Station, yara sa idalom sang impluwensiya sang makahulubog nga ilimnon sang nagtuyo ini nga higtan sang pajama ang iya nga liog.
Wala ini ginhatagan sang atensiyon sang pamilya sa pagdumdom nga masami man niya ini ginahimo kun siya ang nakainom.
Apang pagkaaga, nasapwan na lamang ang biktima nga nagakulob kag wala na sang kabuhi.
Nahibaluan nga una naman nga nagtuyo nga magpanginmatay ang biktima sadto tuig 2000 pinaagi sa pag-inom sang hilo.
Nagpamalibad naman ang pamilya nga ipaidalom sa post-mortem examination ang bangkay sang ila himata.
