Mahimu na nga ma-avail sa bulan sang Abril sang Pantawid Pamilyang Pilipino Program (4Ps) members sa Capiz ang libre nga balayran sa kuryente.
Sa interview sang Bombo Radyo kay Engineer Edgar Diaz, General Manager sang Capiz Electric Cooperative, Inc., iya ginpahayag nga kun ang puluy-an sang isa ka 4Ps member ang nagakonsumo sang 50KWH panubu kada bulan libre na ini sa balayran.
Gin-athag man sini nga kun maglapaw sa 50KWH kada bulan ang nakonsumo, indi ini maka-avail sang lifeline subsidy kag magabayad gid sang bill.
Suno kay Diaz, nagapadayon ang ila cross-matching kag validation sang mga 4Ps members masterlist nga halin sa Department of Social Welfare and Development (DSWD).
Nahibaluan nga yara sa masobra 25,000 ka mga miyembro sang 4ps ang posible maka-avail sang Lifeline Subsidy Rate Program sang national government sa idalom sang direktiba ni President Ferdinand Marcos Jr.
