ROXAS CITY -Pilason ang 51-anyos nga mister matapos nga mabiktima sang hit and run sang motorsiklo samtang nagatabuk sa dalan sa Barangay Milibili Roxas City.
Ginkilala ang biktima nga si Edgar Ambrad, 51-anyos residente sang Sitio Fatima Barangay Milibili sining siyudad.
Sa inisyal nga imbestigasyon sang Roxas City Police Station nagaguha nga samtang nagatabuk sa dalan ang biktima, aksidente ini nga nabungguan sang motorsiklo nga ginamaneho sang wala matumod nga driver.
Nakaangkon sang pilas sa magkatuhay nga porsyon sang kalawasan si Ambrad nga gilayon nga ginbulong sang Capiz Emergency Response Team ukon CERT apang nagpamalibad nga magpadala sa ospital.
Samtang madasig naman nga nagpalagyo ang wala matumod nga driver matapos ang insidente.
Namutikan nga yara sa idalom sang impluwensiya sang makahulubog nga ilimnon si Ambrad.
