TAPAZ, CAPIZ – Patay na sang nasapwan ang isa ka mister sa sulod sang iya balay sa Poblacion, Tapaz, Capiz.
Ang wala na ginhingadlan nga biktima ang nagapang-edaron sang 57-anyos, wala sang trabaho, may asawa, kag nagaisahanon nga nagaistar sa iya puluy-an.
Sa impormasyon nga nagikan sa Tapaz Municipal Police Station, nagpadulong si alyas “Boy” sa ila istasyon agud i-report nga may nagapanimaho nagikan sa balay sang biktima.
Suno kay Boy, ginakabalak-an niya nga pila na ka adlaw nga wala nagaguwa ang biktima kag ulihi ini nga nakit-an sadtong Hulyo 1, alas 4:00 sang hapon.
Gilayon naman nga ginrespondehan sang kapulisan ang lugar kag didto nakit-an nga yara na sa state of decomposition ang biktima nga nagahigda sa iya katre.
Samtang base naman sa panaysayon sang anak sang biktima, masami nga nagainom sang alak ang iya nga amay kag halos adlaw-adlaw ini nga ginahimo. Nagapati man ini nga natural nga kamatayon ang natabo bangud wala man sang kaaway ang iya amay sa ila barangay.
Nagapadayon ang imbestigasyon sang mga otoridad angut sa nasambit nga insidente.
