ROXAS CITY —
Indi pag-untatan sang 61st Infantry (Hunter) Battalion sang Philippine Army ang paglutos sa nabilin nga mga katapo sang rebelde nga New People’s Army sa probinsiya sang Capiz kag kaiping nga mga distrito sa probinsiya sang Iloilo.
Sa interview sang Bombo Radyo sa bag-o nga commander sang 61st IB nga si LTC Sisenando Magbalot Jr., ginpasalig niya nga padayunon nila ang pag-pressure sa mga rebelde tubtob nga sila ang mapapas.
Suno sa opisyal, nagaluya na ang pwersa sang NPA sa rehiyon bangud sa padayun man nga operasyon sang militar batuk sa ila.
Ini ang magluwas pa sa ila ginapatigayon nga mga community support programs sa nabukid nga kabaranggayan kaupod sa mga lokal nga gobyerno, mga ahensiya sang gobyerno kag magkatuhay nga sektor sang sosyodad agud madul-ong ang nagapanguna nga mga serbisyo sa mga pumuluyo.
Suno pa kay Magbalot, nakasentro man ang pila nila ka operasyon sa nabukid nga kabaranggayan sang Tapaz kun sa diin nagapabilin pa ang presensiya sang rebelde nga grupo.
Katuyuan sang militar nga madul-ong sa sini nga mga lugar ang serbisyo sang gobyerno agud indi na mahaylo ang mga pumuluyo diri nga mag-upod sa rebelde nga grupo.
