ROXAS CITY – Naluwas sa katalagman ang 8- ka tuig nga bata nga babayi matapos dyutayan lang ini malumos sa suba sa Barangay Agambulong, Jamindan, Capiz.
Ini ang nakuha nga impormasyon kay Police Staff Sergeant Jomel Luces, imbestigador sang Jamindan PNP sang napakig-angutan sang Bombo Radyo.
Ang biktima amu ang residente sang Barangay Manibad banwa sang Mambusao kag nagpadulong kuntani sa nasambit nga suba agud magselebrar sang kapistahan ni San Juan Bautista kaupod ang iya himata.
Ginpahayag sang amay sang biktima nga nag-una lumpat sa suba ang iya bata kaupod ang pila ka mga indibdwal apang ginkakibot sini sang ginatabangan na ang menor de edad pasaka gikan sa suba.
Nahibaluan nga nadulan sang alinto ang biktima nga gilayon ginhatagan sang CPR sang MDRRMO-Jamindan kag natigayon ini nga maluwas.
Ginpakamaayo naman sang pamilya nga ipadulong sa Mambusao District Hospital ang menor de edad para sa dugang nga pagbulong.
