Ginpaarakan luthang sang isa ka 13 anyos nga estudyante ang eskwelahan sa Kahramanmaras, Turkey sa diin siyam ang patay kag 13 naman ang pilason.
Suno kay Interior Minister Mustafa Ciftci, naglumpat pa ang pila ka mga estudyante halin sa bintana agud makapalagyo.
“We regret to report nine deaths (…) and 13 wounded. Six of them are currently in intensive care, three of whom are in critical condition,” pahayag pa niya.
Suno naman kay Kahramanmaras province governor Mukerrem Unluer, nag-abot ang estudyante nga may mga dala nga armas sa sulod sang iya nga bag.
Nagsulod ini siya sa duha ka classrooms kag nagpaarak luthang.
Dugang pa sang natungdan, ang estudyante ang anak sang isa ka anay pulis nga ginapatihan ginapanag-iyahan sang iya amay ang lima ka armas kag pito ka magazines.
Matapos nagpangluthang, napatay man ang estudyante apang indi pa matumod kun siya mismo ang nag-utas sang iya kabuhi.
