-- ADVERTISEMENT --

Patay ang siyam ka tawo kag indi magnubo sa 28 ang pilason matapos ginlunsyar sang Russia ang massive missile kag drone attack sa Ukraine nga naglawig sang masobra 10 ka oras.

Suno sa mga otoridad sang Ukraine, masobra 400 ka mga attack drone kag 110 ka mga missile, lakip ang 27 ka mga ballistic missile, ang gingamit sa pag-atake. Ang pila sa mga naigo amo ang mga taytay, imprastraktura sa kuryente kag residential building.

Sa pahayag ni Ukrainian President Volodymyr Zelenskyy, lakip sa mga target amo ang mga pasilidad nga nagasuplay sang kuryente sa mga nuclear power plant kag nagaangot sang power grid sang Ukraine sa mga kaiping nga pungsod sini sa European Union.

Ginkondenar man ni Zelenskyy ang paggamit sang Russia sang cluster warheads kag ang gin-alegar serye sang pag-atake agud punggan ang rescue operations kag repairs sa naguba nga mga pasilidad.

Sa pihak nga bahin, ginpakamalaut ni NATO Secretary General Mark Rutte ang pag-atake kag ang pagpasangkad sang epekto sini sa teritoryo sang alyansa.

-- ADVERTISEMENT --

Nagpanawagan si Zelenskyy sa mga kaalyado sang Ukraine nga padasigon ang pagdul-ong sang mga air defense systems kag PAC-2 kag PAC-3 missiles agud maprotektahan ang pungsod batok sa palaabuton nga mga pag-atake.