Nagpaguwa sang mando ang Office of the Ombudsman-Visayas nga ginpasabat sanday Capiz Governor Fredenil “Oto” Castro, Vice Governor Jaime Magbanua, Provincial Administrator Atty. Arthur John Biñas, Provincial Legal Officer Atty. Ma. Leobeth B. Deslate-Delicana, kag Sangguniang Panlalawigan Secretary Zoe Herrera angut reklamo nga ginpasaka ni Fernando Garcia.
Sa mandu sang Ombudsman, ginpahayag nga may yara sang bastante nga basehan agud isumiter sa preliminary investigation kag administrative adjudication ang reklamo batok sa mga opisyal.
Sa interview sang Bombo Radyo kay Fernando Garcia, complainant, ginpahayag sini nga nag-ugat ang iya reklamo sa pag-hire sang 14 ka mga private lawyers under contracts of service sadtong 2022, sa pihak sang pagluntad sang mga abogado sa sulod sang Provincial Legal Office sang Kapitolyo.
Ginkwestyon niya ang pag-hire, kag ginhatagan pagtamod nga ang Provincial Legal Office may yara na sang tatlo ka mga abogado nga suno sa iya, may yara sang regular nga katungdanan kag may ikasarang sa pag-uyat sang legal nga responsibilidad sang probinsya.
Base sa mga dokumento nga ginaalegar ginsumiter sang tagreklamo, nakabaton sang bulanan nga balayran ang 14 ka mga pribado nga abogado nga nagalab-ot sa P20,000 tubtub P50,000.
Sa kabug-usan, ginpahayag nga naggasto sang ginabanta P1,885,000 ang provincial government para sa serbisyo ukon balayran sang mga pribado nga abogado nga nagserbe nga consultant sa sulod sang Calendar Year 2022.
