Nagpaandam ang Commission on Elections ukon COMELEC sa publiko batuk sa nagalapta nga peke nga anunsyo sa internet nga nagapahayag nga ipatigayon ang Barangay and Sangguniang Kabataan Elections ukon BSKE sa Disyembre 14, 2026.
Suno sa COMELEC, peke ang laragway nga nagalapta sa internet nga nagasiling nga may election nga pagahiwaton sa amu nga petsa.
Ginklaro sang commission nga indi na matigayon ang BSKE nga orihinal nga nakatalana kuntani sa Nobyembre 2, kasunod sang pagpatuman sang Republic Act Number 12326, nga nagapalawig sa termino sang mga opisyal sang barangay kag Sangguniang Kabataan sa lima ka tuig.
Sa idalom sang amu nga layi, ang masunod nga BSKE natalana na nga ipatigayon sa Nobyembre 13, 2028.
Dugang pa sang COMELEC, nagapabilin nga epektibo ang layi bangud wala pa nagapagwa ang Supreme Court sang Temporary Restraining Order ukon TRO batuk sa pagpatuman sini.
Bangud sini, ginpanugyan sang commission sa publiko nga siguruhon nga ang ila makuha nga impormasyon nagahalin lamang sa opisyal nga mga website kag social media account sang COMELEC agud malikawan ang paglapta sang sala nga impormasyon parte sa election.
