Ginhangkat ni Mamamayang Liberal Party-list Rep. Leila de Lima ang China nga maghalin sa teritoryo sang Pilipinas kag pamatud-an ang ila handom para sa kalinungan, kasunod sang pahayag ni Chinese Ambassador Jing Quan nga madali lang magdaug ang Beijing kon maggamit ini sang pwersa batuk sa Pilipinas.
Suno kay De Lima, ang pahayag sang China ang indi nagasanto sa ila ginahimo sa West Philippine Sea (WPS), lakip na ang gina-alegar pagpang-harass sa mga Pilipino nga mangingisda. Ginhatagan niya sang importansya nga padayon nga pangapinan sang pungsod ang iya soberanya kag kinamatarong.
Kaangot sini, ginpakamalaot man sang House Young Guns bloc ang pahayag sang ambassador nga suno sa ila mahimo makabig nga pagpamahog sa baylo nga diplomasya. Ginpanindugan ni Deputy Speaker Paolo Ortega V nga ang pamahog sang mas gamhanan nga pungsod sa mas gamay nga estado indi garantiya sang kalinong.
Ang mga Deputy Speakers nga si Jay Khonghun kag iban pa nga mga katapo sang bloc nagpanawagan man sa China nga tahuron ang international rules, ang United Nations Convention on the Law of the Sea (UNCLOS) kag ang 2016 arbitral ruling. Ginhingyo man nila ang Beijing nga untatan na ang pagpang-harass sa mga mangingisda kag personnel sang Philippine Coast Guard.
Ginhatagan pagtamod sang grupo nga dapat sukaton ang kalinong sa pagtahod sa kinamatarung sang Pilipinas, kaluwasan sang mga mangingisda kag kahilwayan sang pungsod sa paggamit sang iya kinamatarung sa exclusive economic zone.
