Ginpanugyanan ni Sen. Erwin Tulfo ang mga overseas Filipino workers (OFW) sa France, Saudi Arabia kag Israel nga mag-doble halung sa tunga sang mga kinagamo, pagpang-atake kag pamahog sa seguridad sa nasambit nga mga pungsod.
Bilang vice chairman sang Senate Committee on Foreign Relations, ginhingyo ni Tulfo ang mga Pinoy sa France nga likawan ang hublag- protesta sang mga estudyante kag mamumugon, partikular sa Paris, bangud sang kinagamo kag mga insidente sang pagpangawat.
Nagpanugyan man ini sa mga OFWs sa Saudi Arabia nga magpabilin nga mabinantayon kag bantayan ang mga balita antes magpadulong sa trabaho bangud sa ginareport nga pagpang-atake sang Iran kag kaalyado sini nga Houthi group sa nasambit nga pungsod.
Ginmensyonar man sang senador ang natabo sa King Khalid International Airport sa Riyadh, kon sa diin pito ka mga OFWs ang ginreport nga napilasan.
Samtang, nagpanugyan naman si Tulfo sa mga Pilipino sa Israel nga kon mahimo, likawan ang pagpadulong sa West Bank bangud sa ginreport nga pagpang-atake sang pila ka nakamaskara nga Israeli settlers batok sa mga dumuluong.
Nagpanawagan man ang senador sa publiko nga ipangamuyo ang kaluwasan sang mga OFWs sa abroad kag sang ila mga pamilya nga nabilin sa Pilipinas.
