CAPIZ – Nagapreparar na ang Provincial Government of Capiz sa posible nga epekto sang El Niño paagi sa pagtukod sang Provincial El Niño Task Force nga magapanguna sa pagplano kag pagpatuman sang mga tikang agud mahagan-hagan ang epekto sang malawig nga tig-ilinit kag kakulang sang ulan.
Paagi sa isa ka Executive Order ni Capiz Governor Fredenil Castro, nasaad ang komposisyon sang task force, ang nagkalain-lain nga sectoral clusters, kag ang tagsa ka katungdanan kag responsibilidad sang mga katapo sini.
Kabahin sa panguna nga katuyuan sang task force ang pagpalig-on sang preparasyon kag mitigation measures sang probinsya, ilabi na sa mga sektor sang agrikultura, suplay sang tubig, panglawas, kag disaster preparedness.
Paagi man sa sini, ginapaabot nga mas mapauswag ang koordinasyon sang nagkalain-lain nga ahensya sang gobyerno kag mga lokal nga panguluhan agud masiguro ang husto kag madasig nga pagsolbar sa mga posible nga problema nga madulot sang El Niño.
