Ginkansela ang face-to-face classes sa Mambusao East National High School kasunod sang nabaton ng shooting threat nga gin-post sa social media.
Sa interview sang Bombo Radyo kay Yzarda Claudette Ballera, Division Information Officer sang Department of Education (DepEd)-Capiz, iya ginpahayag nga temporaryo nga ginbalhin sa Alternative Delivery Mode (ADM) ang klase sa nasambit nga buluthuan agud masiguro ang seguridad sang mga estudyante, manunudlo kag iban pa nga personnel sang eskwelahan.
Suno kay Ballera, gilayon nga nagresponde ang mga kapulisan kag mga opisyal sang barangay agud imbestigaran ang amo nga insidente.
Dugang pa sini, nagpakig-angot man ang pamunuan sang eskwelahan sa mga otoridad agud mabuligan ang imbestigasyon kag masiguro ang kaluwasan sang tanan sa sulod sang eskwelahan.
Sa subong, nagapabilin sa Alternative Delivery Mode (ADM) ang klase sa nasambit nga buluthuan samtang nagapadayon pa ang imbestigasyon sang mga otoridad.
