Nagpanawagan ang Malacañang kay Senador Ronald “Bato” dela Rosa nga boluntaryo nga magsungka kag atubangon ang arrest warrant nga ginpagwa batok sa iya sang International Criminal Court (ICC) agud malikawan ang posible bloodshed.
Suno kay Palace Press Officer Usec. Claire Castro, mas maayo kuntani nga magsungka na lang ang senador agud malikawan ang pag-agay sang dugo.
Ang panawagan ang kasunod sang pahayag ni Interior Secretary Jonvic Remulla nga yara sa Mindanao si Dela Rosa kag ginaalegar yara sa proteksyon sang isa ka grupo nga naga-negosyar sa mga otoridad para sa iya pagsungka.
Paathag ni Remulla, indi basta-basta makahimo sang aresto ang mga otoridad bangud posible magdul-ong ini sa bayolente nga komprontasyon.
Nagpanawagan man si Castro sa mga grupo nga nagasuporta kay Dela Rosa nga indi mangin galamiton agud malikawan ang responsibilidad sang kasuguan para sa mga indibidwal nga dapat atubangon ang hustisya.
Matandaan nga nagpagwa sang arrest warrant ang ICC batuk kay Dela Rosa may kaangtanan sa kampanya kontra iligal nga droga sang administrasyon ni former President Rodrigo Duterte nga gin-angot sa kamatayon sang linibo ka mga tawo.
Samtang, Preso sa gihapon si Duterte sa The Hague, Netherlands, samtang ginahulat ang iya trial may kaangtanan sa kaso nga crimes against humanity.
