Yara na sa maayo nga kahimtangan ang 30-anyos nga lalaki matapos ginbun sa Sitio Hacienda, Barangay Lacaraon, Dao, Capiz.
Ang biktima amo si alyas Rod kag ang suspek ang ginkilala kay alyas Will.
Sa interview sang Bombo Radyo Roxas kay Police Major Rey C. Dordas, Officer-in-Charge sang Dao Municipal Police Station, iya ginpahayag nga nagluntad ang pagbinaisay sa tunga sang biktima kag sang iya nga utod nga si alyas Will matapos ang ila pag-inom sang makahulubog nga ilimnon.
Nabatian sang anak ni Will nga si alyas Jam ang pag-inaway sang iya amay kag sang iya tiyo nga si Rod. Bangod sini, nagkuha si Jam sang kutsilyo kag ginbuno ang iya tiyo, kag nag-angkon sang tatlo ka samad sa liog kag sa tuo nga bahin sang iya nga likod.
Gilayon nga gindala sang Dao Emergency Response Unit ang biktima sa Dao District Hospital para sa nagakaigo nga pagbulong. Sa karon, stable na ang kondisyon sang biktima.
Samtang, naaresto si Will, ang utod sang biktima, kag yara na sa kustodiya sang Dao Municipal Police Station.
Padayon naman nga ginapangita sang kapulisan si Jam, nga yara pa sa gihapon sa kahimtangan nga at large.
Ginapatihan nga nag-ugat ang insidente sa pagbinaisay samtang nagainom sang makahulubug nga ilimnon.
Apang, nagpahayag ang biktima nga indi na niya pagpadayunon ang kriminal nga reklamo batok sa iya utod kag gumangkon, bangod mas ginpili niya nga husayon na lamang ang insidente sa sulod sang ila pamilya.
