Ginpasalamatan ni Punong Barangay Castor Holce Bialen sang Brgy. VIII, Roxas City, ang mga tikang nga ginahimo sang Roxas City Government sa padayon nga pag-develop sang Teodoro Arcenas Trade Center (TATC), ilabi na ang pag-clearing sang lugar kag pagpakay-o sang karsada agud mangin mas matawhay ang dalagan sang trapiko.
Sa interview sang Bombo Radyo Roxas kay Punong Barangay Bialen, iya ginpahayag ngabangud sa tikang, mas magalapad ang karsada kag mangin mas maayo ang dalagan sang trapiko sa TATC, kon makompleto na ang clearing kag ang pag-organisar sang mga parking area.
Pahayag pa niya, isa sa mga nagatuga sang traffic amo ang mga salakyan nga nagaparking sa duha ka kilid sang kalsada ukon double parking.
Samtang, gin-ako niya nga may mga reklamo sya nga nabaton may kaangtanan sa mga tikang nga ginahimo sa lugar.
Apang, iya ginapaathag nga ang katuyuan sang mga pagbag-o kag ang benepisyo sini, indi lamang para sa mga nagabaligya kundi para man sa bilog nga komunidad kag sa mga nagakadto sa TATC.
Nagpanawagan man ang natungdan sang kooperasyon sang tanan angut pagpakay-o sang TATC agud mangin mas matinlo ang palibot, mas lapad ang karsada kag mas madasig ang dalagan sang trapiko.
