Nakabaton sang bulig pinansyal ang 1,075 ka mga mangingisda halin sa nagkalain-lain nga banwa sa Capiz sa idalum sang Presidential Assistance for Farmers and Fisherfolk Program (PAFFP).
Sa interview sang Bombo Radyo kay Alvin Beltran, Officer-in-Charge sang Provincial Fisheries Office, iya ginpahayag nga ginpili ang mga benepisyaryo base sa mga mangingisda nga rehistrado kag apektado sang crisis.
Sa Primero Distrito sang Capiz, 805 ka mangingisda ang nakabaton sang bulig, nga nagikan sa Pilar nga may 233, President Roxas nga may 168, Pontevedra nga may 174, Panay nga may 100 kag Roxas City nga may 130 ka benepisyaryo.
Samtang, 270 ka mangingisda naman sa Segundo Distrito ang nakabaton sang bulig, nga nagikan sa Sapian nga may 46 kag Ivisan nga may 224 ka benepisyaryo.
Suno kay Beltran, dako ini nga bulig sa mga mangingisda nga apektado sang padayon nga pagsaka sang presyo sang gatong kag sang epekto sang El Niño, agud mabuligan sila nga makabalik sa ila pagpangisda kag mapadayon ang ila pangabuhian.
