CAPIZ-May 241 ka panimalay sa 12 ka mga sitio sa lima ka banwa sa ikaduha nga distrito sang Capiz ang nakabenepisyo sa Sitio Electrification Program (SEP), nga ginpatuman sang Oktubre 22, 2026, agud mahatagan sang kuryente ang mga komunidad nga wala pa makabaton sang amo nga serbisyo.
Ang mga benepisyaryo ang naghalin sa mga banwa sang Cuartero, Dumarao, Jamindan, Sigma kag Sapian, nga nangin bag-o nga mga miyembro-konsumedor sang Capiz Electric Cooperative (CAPELCO).
Pinakadamo ang mga benepisyaryo sa Jamindan nga may 123 ka panimalay halin sa anom ka sitio sa mga barangay sang Agambulong, Pasol-o, Pangabat, Lucero kag Agbun-od. Ginasundan ini sang Dumarao nga may 48 ka panimalay sa Barangay Aglalana, kag Cuartero nga may 40 ka panimalay sa duha ka sitio sang Barangay Agnaga kag Bun-od.
May 20 man ka panimalay sa duha ka sitio sang Barangay Dayhagon sa Sigma, samtang 14 ka panimalay sa isa ka sitio sang Barangay Lonoy sa Sapian ang nakabenepisyo sa programa.
Ang Sitio Electrification Program ang isa sa mga inisyatibo nga ginatuyo nga masolbar ang kakulang sang suplay sang kuryente sa mga malayo kag wala pa makakonekta nga mga komunidad sa probinsya. Suno sa impormasyon sang probinsyal nga gobyerno, madugay na ini nga gintinguhaan ni Governor Fredenil H. Castro sang siya anay ang nagaserbe bilang kongresista, kag padayon nga ginasuportahan ni Second District Representative Inday Baby Jane T. Castro, sa pagbulig sang CAPELCO.
Lakip sa mga ginapaabot nga benepisyo sang programa ang mas maayo nga kondisyon sa pagtuon sang mga kabataan sa gab-i, ilabi na sa mga panimalay nga nagasalig pa anay sa kingki ukon iban nga pamaagi sang paghatag sang kasanag.
Nag-upod sa aktibidad sanday Governor Castro, Sigma Mayor Dante Rizal Eslabon, mga katapo sang Sangguniang Bayan sang Sigma, First District Deputy Administrator Ricky Martin, kag CAPELCO Acting General Manager Engr. Edgar Diaz, upod ang mga katapo sang board of directors kag iban pa nga mga representante sang kooperatiba.
