Nagpanawagan si Defence Secretary Gilberto Teodoro Jr., sa masunod nga mga lider sang militar nga indi magpakampante kag padasigon ang pagpabaskog sang depensa kag pungsodnon nga seguridad sang Pilipinas.
Ini ang pahayag ni Teodoro kadungan sang selebrasyon sang ika-128 nga anibersaryo sang Philippine Military Academy (PMA) sadtong Oktubre 24, 2026 sa syudad sang Baguio.
Ginhatagan pagtamod sang tiglikom nga kinahanglan nga mangin mas seryoso ang pungsod sa pag-atubang sang mga pagpanghangkat, partikular sa pagdepensa sang teritoryo kag soberanya sang Pilipinas.
Suno kay Teodoro, nagakadapat nga batuan ang mentalidad sang mahapos nga pagsurender kag dapat himuon ang mga tikang agud mapabaskog ang ikasarang sang pungsod sa pagdepensa sang pungsodnon nga interest.
Ginhingyo man sini ang PMA kag ang Armed Forces of the Philippines nga padayon nga i-practice ang mga bag-o nga teknolohiya kag nagabag-o nga mga pamahog sa tuyo nga mapasanyog ang ikasarang sa depensa sang Pilipinas, ilabi na sa pagpatuman sang iya mga kasuguan sa malapad nga maritime domain sang pungsod.
