Ginpaathag sang isa ka legal expert ang kinalain sang annulment, declaration of absolute nullity of marriage kag legal separation agud mapalapnag ang ihibalo sang publiko sa nagkalain-lain nga legal remedy nga mahimo makuha sang mag-asawa nga nagaatubang sang problema sa ila relasyon.
Sa interview sang Bombo Radyo kay Atty. Edryl B. Ranido sang Integrated Bar of the Philippines-Capiz Chapter, iya ginpahayag nga ang annulment isa ka judicial remedy para sa voidable marriage, samtang ang declaration of absolute nullity ginahimo para sa kasal nga ginakabig nga void halin pa sa pagsugod.
Suno kay Ranido, lain naman ang legal separation bangud bisan pa nga mahimo na magpuyo nga separado ang mag-asawa, wala gihapon ginaputol ang ila marriage bond ukon ang legal nga pagkabugkos sang ila pag-asawahay.
Gani, indi mahimo nga magpakasal liwat ang isa ka tawo base lamang sa kamatuoran nga dugay na sila nga separado sang iya asawa ukon bana, ukon bisan pa may yara na sang decree of legal separation.
Dugang pa sang natungdan, importante nga masiguro ang finality sang desisyon sang korte kag ang pagtuman sa mga kinahanglanon sa pagrehistro antes magpakasal liwat ang isa ka tawo matapos ang annulment ukon declaration of nullity of marriage.
