Mabaskog nga ginpanindugan ni Senator Panfilo “Ping” Lacson nga balibaran sini ang posisyon bilang bise presidente sa tion nga ma-impeach si Vice President Sara Duterte.
Suno kay Lacson, mas gusto sini nga magpabilin sa senado bangud tubtub 2031 ang iya termino bilang senador.
Kasunod ini sang panawagan ni Senador Alan Peter Cayetano sa mga senador nga nagaserbe bilang judge sa impeachment trial agud athagon kun isikway nila ang posisyon bilang bise presidente agud malikawan ang pagpangduha-duha sa ila palaabuton nga mga desisyon.
Gin-engganyo man ni Lacson si Cayetano nga indi pagpangunahan si President Ferdinand “Bongbong” Marcos Jr. sa pagpili sang posible nga tal-us, bangud ang presidente ang may poder sa pagpili suno sa proseso nga gintalana sang kasuguan.
Sa tunga sang isyu, importante nga siguraduhon nga ang bisan ano nga desisyon sa impeachment nabase sa ebidensya kag kasuguan, kag indi maimpluwensyahan sang posible nga personal nga interest sa politika.
