Ginbandera sang People’s Budget Coalition ang ginaalegar masobra P1 trillion nga balor sang alokasyon sa ginaduso nga 2027 national budget nga ila gintumod nga may red flags sa hearing sang Senate Finance Committee upod sa mga civil society organizations.
Suno kay coalition co-convenor AJ Montesa, lakip sa mga kwestyonable nga alokasyon amo ang P210 billion nga soft pork, P695 billion sa hard pork, kag P112 billion nga shadow pork ukon unprogrammed appropriations.
Gina-angot sang grupo ang soft pork sa mga programa sa pagbulig nga ginaalegar nagadepende sa patronage, samtang ang hard pork nagapatuhoy sa mga proyekto sa imprastraktura nga ginaalegar maimpluwensyahan sang mga politiko.
Ginduso sang Coalition ang pagsaylo sang pondo halin sa MAIFIP pakadto sa PhilHealth, halin sa Tulong Dunong pakadto sa Tertiary Education Subsidy, kag halin sa AICS pakadto sa 4Ps agud mas direkta nga makabenepisyo ang publiko sa mga programa sang gobyerno.
Nagpangabay man ang grupo nga dulaon ang guarantee kag referral letter system sa pagkuha sang medical assistance kag ipatuman ang processing timeline kag priority lanes para sa mga emerhensya nga may kaangtanan sa pagbulong kag paglubong.
Ginkwestyon man sang People’s Budget Coalition co-convenor Kenneth Ibasco Abante ang halos 7,000 ka mga proyekto nga nagabalor sang P190 billion nga ginaalegar wala sang attached nga dokumentasyon nga makita sang publiko, apisar nga ginklaro sini nga wala nila gina-akusahan sang korapsyon ang tanan nga kasubong sini nga mga proyekto.
Ginpanawagan ni Abante sa Senado nga kuhaon sa ginaproponer nga national budget ang mga proyekto nga wala sang ginbalhag nga dokumentasyon kag ginahingyo sa Presidente nga indi ini pag-aprubahan, samtang natalana nga istoryahan sang Bicameral Conference Committee ang ginaduso nga P7.2 trillion national budget para sa 2027 sa 2nd week sang Disyembre.
