Ginkumpirmar sang Philippine Embassy sa Madrid, Spain nga isa ka Pinoy ang nakaangkon sang menor injuries sa pagbungguanay sang tren sa pungsod.
Suno sa statement sang embahada, gindala sa isa ka ospital ang ginapahayag nga Pinoy agud mahatagan sang medical attention.
Samtang, padayon ang koordinasyon sang embahada sa natungdan nga otoridad kag sa train operator agud mahibaluan kun may iban pa nga mga Pinoy nga kalakip sa mga pasahero sa mga train nga involved sa insidente.
Nagpanawagan man ang embahada sa mga pamilya kag abyan sang mga Pilipino nga mahimo yara sa tren ukon nagabyahe sa Madrid-Andalusia route nga makig-angot sa Renfe family helpline sa (+34) 900 101 020 ukon sa 24-oras nga hotline sang embahada sa (+34) 619 491 861.
Gin-engganyo man ang publiko nga magsumiter sang impormasyon angut sa iban pa nga mga Pinoy nga posible apektado sang insidente pinaagi sa online form nga ginhatag sang embahada.
Samtang, base sa report, naglab-ot na sa 68 ang napatay sa train collision, samtang padayon naman ang pagpakig-angot sang mga otoridad agud matumod ang iban pa nga posible biktima.
