Ginpahanumdom sang Simbahang Katolika ang publiko nga ang Undas indi horror event, kundi tion sang pagdumdom sa mga santos kag pagpangamuyo para sa mga kalag sang ila mga himata.
Sa interview sang Bombo Radyo kay Msgr. Meliton Oso, Director sang Jaro Archdiocesan Social Action Center, iya ginpahayag nga ang selebrasyon sang Undas nagahatag sang kahigayunan sa mga tumuluo nga dumdumon ang mga santos kag pangamuyuan ang mga kalag sang ila mga pinalangga nga nataliwan.
Suno kay Oso, ang All Saints’ Day nga ginasaulog kada Nobyembre 1 amo ang pagdumdum sa tanan nga mga santos, samtang ang All Souls’ Day sa Nobyembre 2 amo ang tion sang pagpangamuyo para sa mga kalag sang mga napatay.
Gin-athag man ni Oso ang tatlo ka bahin sang Simbahan, Ang Triumphant Church amo ang mga santos nga yara na sa langit, ang Suffering Church amo ang mga kalag sa purgatoryo, kag ang Militant Church amo ang mga tumuluo nga nagakabuhi pa sa kalibutan kag nagapadayon sa pagtuo sa Dios.
