Nagpanawagan ang Roxas City Police Station sa publiko nga boluntaryo nga isurrender ang mga ilegal nga armas bilang kabahin sang kampanya batok sa loose firearms.
Sa interview sang Bombo Radyo kay Police Lieutenant Colonel Rogelio Tomagtang Jr., Chief of Police sang Roxas City Police Station, iya ginpahayag nga may yara na sang 1,911 ka rehistrado nga armas sa Roxas City nga expired na ang registration.
Suno kay Tomagtang, nakapadala na ang kapulisan sang notice sa 700 ka tag-iya sang armas agud mapahanumdom sila nga mag-renew sang ila mga dokumento.
Ginasuportahan man sang Roxas City Police Station ang programa sang Police Regional Office 6 nga Restrict, Track and Turn-In ukon RTT 3389, kag ang CAPeace-Tawhayan Program sang Capiz Police Provincial Office.
Lakip sa mga armas nga nasurrender na sa ila talatapan amo ang caliber .38, improvised nga short shotgun, caliber .45 kag caliber 9mm nga wala sang lisensya.
Ginpahayag man sang natungdan nga wala sang kaso nga pagaatubangon ang mga indibidwal nga boluntaryo nga magsurrender sang ila armas.
