Ginalauman nga magabulig sa pagpauswag sang produksyon kag pangabuhian sang mga mangunguma sa banwa sang Pontevedra, Capiz ang pagpanagtag sang vegetable seeds kag pagpatuman sang solar-powered irrigation system.
Sa interview sang Bombo Radyo kay Joenel Bueno Castro, OIC-Municipal Agriculturist sang Pontevedra, iya ginpahayag nga kabahin ini sang mga programa sang Municipal Agriculture Office agud masuportahan ang mga mangunguma kag mabuligan sila nga mapadamo ang ila produksyon sa epekto sang Super El Niñp.
Suno kay Castro, ang pagpanagtag sang vegetable seeds magahatag oportunidad sa mga mangunguma nga makatanom sang nagkalain-lain nga klase sang utan nga mahimo nila magamit para sa ila kaugalingon nga konsumo ukon ibaligya sa merkado agud makadugang sa ila kita.
Samtang, paagi naman sa solar-powered irrigation system, mas mapadali ang paghatag sang tubig sa mga uma, ilabi na sa tion sang tig-init kag kakulang sang ulan, nga isa sa mga kabudlayan nga ginatubang sang mga mangunguma.
Dugang pa sini, ginapaabot nga paagi sa amo nga mga proyekto, mas mapalig-on ang produksyon sa sektor sang agrikultura kag mabuligan ang mga mangunguma nga makabaton sang dugang nga oportunidad para mapauswag ang ila pangabuhian.










