Ginalauman nga mas magabudlay pa ang adlaw-adlaw nga pagpangabuhi sang mga Pilipino bangud sa padayon nga pagnubo sang balor sang piso batok sa dolyar.
Sa interview sang Bombo Radyo kay Mr. Elmer Forro, Secretary General sang Bayan Panay, iya ginpahayag nga halos tanan nga kinahanglanon sang mga Pilipino, halin sa pagkaon tubtob sa gatong, naga-depende sa mga produkto nga imported ukon halin sa iban nga pungsod.
Suno kay Forro, bangod sini, dako ang posibilidad nga magmahal pa ang mga balaklon kag dugang nga mabug-atan ang tagsa ka mga katapo sang panimalay sa ila adlaw-adlaw nga galastuhon.
Dugang pa niya, iresponsable para sa isa ka mataas nga opisyal sang gobyerno nga hambalan ang publiko nga indi magpanic sa tunga sang nagadamo nga kabudlayan nga ginaatubang sa adlaw adlaw.
Pahayag ni Forro, ang kinahanglan sang katawhan amo ang konkreto nga mga solusyon agud masolusyunan ang epekto sang pagnubo sang piso, kag indi lamang mga pasalig halin sa gobyerno.
