Nagapabilin nga kritikal ang kondisyon sang komedyante nga si Ate Gay ukon Gil Morales kag nagasandig sa gihapon sa life-support machine matapos nga na-stroke sang Huwebes, Oktubre 29.
Sa medical update sang pamilya sini nga Biyernes, ila ginpahayag nga nalampuwasan na sang komedyante ang una nga septic shock tuga sang malala nga impeksyon kag pneumonia.
Apang ginpahayag nga may problema ini sa natuo nga bahin sang utok bangud sa stroke, gani nagapabilin ini sa Intensive Care Unit (ICU) sang Asian Hospital and Medical Center sa Muntinlupa City.
Suno sa pamilya, indi pa safe nga isaylo sa iban nga ospital si Ate Gay bangud sa iya nga kondisyon, gani sundon anay nila ang panugyan sang mga doktor nga padayunon ang pagpabulong sa nasambit nga ospital.
Nagpasalamat man ang pamilya sa padayon nga bulig pinansyal, suporta kag pangamuyo sang publiko samtang padayon ang pagpangayo sang dugang nga medical assistance para sa komedyante.
