Nagpahanumdom ang Office of Civil Defense (OCD) 6 sa publiko nga maghalong kag magsunod sa mga pagsulundan sa pagbisita sa mga sementeryo sini nga Undas 2026.
Sa interview sang Bombo Radyo kay Director Raul Fernandez sang OCD-6, iya ginpahayag nga importante nga mangin preparado ang publiko agud malikawan ang anuman nga insidente samtang ginadumdum ang tigkalalag.
Suno kay Fernandez, dapat bantayan sang maayo ang mga personal nga gamit, bantayan sang maayo ang mga kabataan kag mga tigulang kag likawan ang pagginutok sa mga lugar nga ginalauman nga magadugok ang mga tawo.
Suno sa iya, dapat man nga maghalong ang publiko sa tuman nga kainit nga mahimo ma-eksperyensyahan samtang yara sa sementeryo, ilabi na bangud sa epekto sang El Niño.
Ginapanugyanan ang mga magabisita nga mag-inom sang bastante nga tubig, magsuksok sang komportable nga panapton kag magdala sang payong agud maproteksyunan ang ila kaugalingon sa direkta nga silak sang adlaw.
Dugang pa sang natungdan, mangin aligmat kag unahon ang kaluwasan sang tagsa ka miyembro sang pamilya sa pagdumdom sang Undas.
