TAPAZ, CAPIZ – Nagdeklarar sang full alert status ang Tapaz Municipal Police Station bilang kabahin sang preparasyon para sa Undas 2026.
Sa interview sang Bombo Radyo kay Police Major Gregg Anthony V. Salbang, Chief of Police sang Tapaz Municipal Police Station, iya ginpahayag nga naglab-ot sa 42 ka police personnel ang ila natalana nga i-deploy subong nga adlaw kun sa diin maga umpisa sila sa 5:00 sa aga tubtob nga wala na sang tawo nga nabilin sa mga lugar nga ila ginabantayan.
Suno kay Salbang lakip sa pagabantayan nila ang Duha ka Sementeryo, Tapaz Transport Terminal, Public Market kag dugang man sa pagpalig-on sang siguridad ang pagpahamtang sang police assistance desks nga ginalauman nga makabulig sa publiko sa tion sang kinahanglan sang assisstance.
Pahayag pa niya sa pagsugod sang tigkalalag bawal nga dal-on ang matalom nga mga bagay, makahulubog nga ilimnon, speaker, armas luthang kag nagkalain-lain nga pagkabutang sang pagsugal.
Sa karon ginapahanumdom sang natungdan nga ang tanan nga nagapanglakaton sa sementeryo i-sekyar ang ila puluy-an agud malikawan ang mga insidente kag sa tanan nga nagabisita sa sementeryo nga bantayan sang maayo ang ila personal nga gamit, ilabi na sa pagsulod kag paggwa sa sementeryo, agud malikawan nga madulaan sang mga pagkabutang.
