Nagapadayon ang Bureau of Fire Protection (BFP) Sapian sa pag-imbestigar sa nagluntad nga insidente sang sunog malapit sa building sang Local Government Unit (LGU) sa banwa sang Sapian.
Sa interview sang Bombo Radyo kay Senior Fire Officer 3 Erwin Oropeo, Acting Municipal Fire Marshal sang Sapian Fire Station, iya ginpahayag nga wala pa sang pinal nga resulta ang imbestigasyon agud matumod ang aktuwal nga gintunaan sang sunog.
Suno kay Oropeo, nakabaton ang ila istasyon sang report pasado alas-3:00 sang hapon kag gilayon nga nagresponde ang mga bombero sa lugar agud mapunggan ang paglapta sang kalayo.
Pahayag pa niya, naglab-ot sa kapin P4,200 ang ginalantaw nga kahalitan nga gintuga sang sunog.
Sa pihak sini, ginapanawagan ni Oropeo ang publiko nga mangin mas mahinalongon kag mag-obserbar sang nagakaigo nga fire safety measures agud malikawan ang kaangay nga insidente.
Ginpahanumdom man niya ang tanan nga siguruhon nga wala sang nabilin nga nakasindi nga mga kagamitan, kag regular nga usisaon ang mga electrical connections agud malikawan ang sunog.
