Wala ginakabig sang grupo sang mga mamumugon nga solusyon sa nagaatubang nga problema sa pagsaka sang presyo sang gatong ang mga suhestyon ni President Ferdinand Marcos Jr., lakip na ang paggamit sang electric vehicles.
Sa interview sang Bombo Radyo kay Mr. Wennie Sancho, Secretary General sang General Alliance of Workers Association (GAWA), iya ginpahayag nga indi masarangan nga mangin solusyon ang paggamit sang electric vehicles bangud may kaangtanan man ini nga magasto sa pagsuluktan ukon pag-charge sang kuryente.
Suno kay Sancho, indi dapat magpabilin sa mga suhestyon kag mga promisa ang gobyerno, kundi kinahanglan magpatuman sang konkreto kag nagakaigo nga mga tikang agud mabuligan ang mga mamumugon kag iban pa nga sektor nga apektado sang pagsaka sang presyo sang mga nagakinahanglanon.
Pahayag pa niya, importante nga tutukan sang administrasyon ang aktuwal nga problema nga ginatubang sang publiko kag magpatuman sang mga programa nga may direkta nga benepisyo sa mga pumuluyo.
Dugang pa sang natungdan, nagakinahanglan ang mga mamumugon sang epektibo nga aksyon sang gobyerno agud ma-ibanan ang ila galastuhon kag indi na magdugang ang kabudlayan sa ila pang-adlaw-adlaw nga pangabuhi.
