Magapatubang sa kaso nga frustrated homicide ang suspek sa pagpanglabo sa isa ka 49-anyos nga lalaki sa Sitio Cogon, Barangay Cabugao, Roxas City.
Ang biktima amo si alyas “Mer,” 49-anyos, samtang ang suspek aman amo si alyas “Jie,” lunsay nga residente sang nasambit nga lugar.
Sa interview sang Bombo Radyo kay Police Lieutenant Colonel Rogelio Tomagtang Jr., Chief of Police sang Roxas City Police Station, iya ginpahayag nga nagapreparar na kuntani matulog ang biktima sang nakabati ini sang gahod kag mabaskog nga tingog halin sa gwa sang ila puluy-an.
Bangud sini, naguwa ang biktima agud usisaon kag komprontahon ang persona.
Apang hinali nga nagguwa ang suspek halin sa ila puluy-an nga may dala nga talibong kag ginapatihan nga yara sa impluwensya sang makahulubog nga ilimnon.
Suno kay Tomagtang, may nagluntad ang komosyon sa tunga sang duha tubtob nga ginlabo sang suspek ang biktima, nga naigo sa likod nga bahin sang iya lawas.
Gilayon naman nga gindala sa ospital ang biktima agud mahatagan sang nagakaigo nga pagbulong.
