Madinalag-on nga ginpatigayon sang pila ka ahensya sang gobyerno ang Nationwide Simultaneous Earthquake Drill subong nga adlaw, Nobyembre 5, 2026.
Sa interview sang Bombo Radyo kay Gilbert Fernando, Acting Head sang CDRRMO sa Roxas City, iya ginpahayag nga katuyuan sang amo nga aktibidad amo ang tudluan ang publiko parte sa husto nga mga tikang nga dapat himuon sa tion sang linog agud malikawan ang mga piligro.
Suno kay Fernando, kabahin sang aktibidad ang pagsunod sa “Duck, Cover, and Hold” ukon pagduko, pagpasilong sa idalom sang mabakod nga lamesa kag paghawid sini tubtob nga mag-untat ang linog.
Ginpatigayon ang evacuation drill kun sa diin hapsay nga nagguwa ang mga partisipante sa ila mga building kag nagkadto sa natalana nga evacuation area ukon bukas nga lugar nga malayo sa posible nga mahulog nga mga butang kag naguba nga estruktura.
