Preparado na sa pagsugod ang Capiz Private Schools Association (CAPRISA) 2026 nga ginapasakupan sang nagkalain-lain nga pribado nga eskwelahan agud ipakita ang talento, abilidad kag sportsmanship sang mga estudyante sa nagkalain-lain nga sports events.
Ang Colegio de la Purisima Concepcion (CPC) ang nangin host school para sa sini nga tuig nga paghiwat sang CAPRISA 2026.
Sa interview sang Bombo Radyo kay Mr. Wenie Gorriceta, Sports Coordinator sang Colegio de la Purisima Concepcion, iya ginpakigbahin ang preparasyon sang ila eskwelahan bilang host sang sini nga sports competition.
Suno kay Gorriceta, importante ang maayo nga koordinasyon kag preparasyon agud masiguro ang hapsay nga paghiwat sang mga aktibidad kag kompetisyon, lakip na ang seguridad kag kaayuhan sang mga atleta kag delegasyon.
Dugang pa sini, paagi sa CAPRISA 2026, nahatagan sang oportunidad ang mga estudyante nga mapauswag ang ila abilidad sa sports, mapakita ang ila talento kag mapabakod ang camaraderie kag sportsmanship sa tunga sang nagkalain-lain nga eskwelahan.
