Naghatag sang dungog sa siyudad sang Roxas ang isa ka jail officer matapos makasungkit sang regional topnotcher sa ginpatigayon nga Criminologist Licensure Examination.
Sa interview sang Bombo Radyo kay Jail Officer 1 Francis Anoche, iya ginpakigbahin ang mga sakripisyo kag kabudlayan sang iya pamilya agud mapatapos siya sa pag-eskwela, kun sa diin ang iya amay nagapangabudlay bilang tricycle driver samtang ang iya iloy nagabaligya sang kakanin.
Suno kay Anoche, ang pagkuha niya sang kurso nga Criminology ang isa man sa iya pagtuman sang handum sang iya utod nga nagtaliwan na, rason nga nangin dugang ini nga inspirasyon sa iya pagpanikasog.
Pahayag pa sini, ang tanan nga kadungganan nga iya nabaton resulta sang madugay nga pagtuon, pag-antus kag pagpanikasog, gani dako ang iya pagpasalamat sa iya pamilya nga nangin suporta niya sa tanan nga tion.
Nagalaum man si Anoche nga ang iya naangkon nga kadalag-an mangin inspirasyon sa iban nga mga pamatan-on, labi na sa mga nagaagi sa kabudlayan, nga indi mag-untat sa pagtinguha sang ila mga handum sa kabuhi.
