LANTANGAN, Pontevedra, Capiz – Pilason ang apat ka persona matapos ang nagluntad nga stabbing incident sa Barangay Lantangan, Pontevedra, Capiz.
Ang biktima amo sanday alyas Joy, 26-anyos, Franz, 31-anyos, Dodo, 52-anyos, kag alyas Jun, 36 anyos nga lunsay residente sang nasambit nga lugar. Samtang ang suspek ginkilala kanday Ogil, 45-anyos, residente sang Sitio Tumlos, kag alyas Oyo, 46-anyos residente sang Sitio Poor sang nasambit nga banwa.
Sa interview sang Bombo Radyo kay Police Captain Maria Fe T Umiten, Officer-in-Charge sang Pontevedra Municipal Police Station, iya ginpahayag nga natabo ang insidente pasado alas-8:00 sang gab-i, matapos nga nagreklamo ang isa sa mga biktima bangud sa mabaskog nga volume sang sound system sang mga suspek.
Suno kay Umiten, nagkadto ang isa ka biktima sa balay sang mga suspek agud magpangabay nga pahinayon ang volume sang sound system bangud may nagamasakit sa ila panimalay. Apang, imbes nga masolusyunan ang problema, nagresulta ini sa komprontasyon kag pagpanglabo sa mga biktima.
Pahayag pa niya, base sa inisyal nga imbestigasyon, si alias Ogie ang ginatudlo nga naggamit sang bolo sa paglabo sa mga biktima, samtang ginatutukan pa sang kapulisan ang eksakto nga partisipasyon ni alias Uyo sa insidente.
Dugang pa sang natungdan, ang apat ka biktima nag-angkon sang mga pilas sa nagkalain-lain nga bahin sang ila lawas kag gindala sa pampubliko nga hospital para sa pagbulong. Si alias Dodo, nga amo ang amay, gindala sa lain naman nga hospital para sa dugang nga medical attention bangud sa malala nga pilas nga na-angkon.
Gin-athag man ni Umiten nga base sa inisyal nga impormasyon sang kapulisan, naka-inom sang makahulubog nga ilimnon ang mga suspek sang natabo ang insidente, kun sa diin ginaberipika pa ini paagi sa mga pahayag sang mga witness kag iban pa nga ebidensya nga nakolekta.
Sa karon ginapanawagan naman sang natungdan sa publiko nga mangin responsable sa paggamit sang sound system, respetuhon ang mga kasilingan kag likawan ang kinagamo, samtang ang duha ka suspek samtang ginaproseso ang mga dokumento para sa pagpasaka sang nagakaigo nga kaso. Suno kay Umiten, ginakonsiderar ang posible nga kaso nga attempted homicide ukon attempted murder, depende sa mga sirkumstansya kag legal nga evaluation sang piskal.
