Ginbawian sang kabuhi ang isa ka senior citizen matapos ginlabo sa ila puluy-an sa Sitio Proper, Barangay Jaena Norte, Jamindan, Capiz.
Ang biktima amo si alyas “Santos,” samtang ang suspek amo si alyas “Roy,” 45-anyos, residente sang Passi City, Iloilo, apang temporaryo nga nagapuyo sa nasambit nga barangay.
Sa interview sang Bombo Radyo kay Police Major Jaypee D. Silvestre, Officer-in-Charge sang Jamindan Municipal Police Station, iya ginpahayag nga magkaupod nga nagainom ang biktima kag ang suspek sang antes natabo ang insidente.
Suno kay Silvestre, ginatan-aw nga ang daan nga indi pag-intindihanay sa tunga sang duha amo ang posible nga motibo sang krimen, nga may kaangtanan sa ginapahayag nga pagpangyaguta sang biktima sa anak sang suspek nga isa ka Person with Disability (PWD).
Sa subong, yara na sa kustodiya sang Jamindan Municipal Police Station ka magapangatubang sa kaso nga homicide.
