ROXAS CITY-Nagpatigayon ang Provincial Government of Capiz, pinaagi sa Capiz Provincial Bantay Dagat (CPBD), sang duha ka importante nga inisyatibo nga may tinutuyo nga palig-onon ang pagpatuman sang mga kasuguan sa pagpangisda, pagpaluntad sang responsable kag malungtaron nga pagpangisda, kag pagpaayo sang maritime services sa probinsya.
Lakip diri ang ceremonial turnover sa mga nagakaigo nga otoridad sang mga eksplosibo nga gin-isurrender nga ginagamit sa pagpangisda kag mga ginadumilian nga pukot ukon fine-mesh nets, nga ginpatigayon subong nga adlaw Nobyembre 10, 2026, sa Capiz Provincial Bantay Dagat Headquarters sa Barangay Balogo, Pilar, Capiz.
Kabahin man sang inisyatibo ang pagpanalipod sang kadagatan paagi sa pagpahamtang sang mas hugot nga pagpatuman sang mga kasuguan batok sa makahalalit kag ilegal nga pamaagi sang pagpangisda.
Samtang, sa Nobyembre 13, 2026, ginatakda ang pagpirma sang Memorandum of Agreement (MOA) sa tunga sang Provincial Government of Capiz kag Maritime Industry Authority (MARINA) para sa pag-establisar sang MARINA Satellite Office sa Roxas City. Paagi diri, ginapaabot nga mangin mas malapit kag mas hapos ma-access sang mga taga-Capiz ang nagakaigo nga maritime services kag mga transaksiyon nga ginadumalahan sang ahensya.
Nagtambong sa aktibidad sanday Governor Fredenil H. Castro, Vice Governor Jaime O. “Mitang” Magbanua, Board Members Trina Marie Ignacio, Gilbert Ardivilla, Blesilda Almalbis kag Jose Fulgencio Del Rosario; Chief of the Fisheries Management, Regulatory and Enforcement Division (FMRED) Dr. Erwin E. Ilaya; Police Executive Master Sergeant Daniel R. Tunod; Acting Chief sang Fisheries Division sang Provincial Agriculturist Office Ramie Lyn G. Bañares; Panay Vice Mayor Paolo Besa; kag Capiz Provincial Bantay Dagat Chief Lyndofer “Glenn” Beup.
Ginapaabot nga paagi sa sini nga mga inisyatibo, mas mapalig-on ang pagdumala kag pagpanalipod sang mga katubigan sang Capiz, samtang mapalapad ang access sang mga pumuluyo sa importante nga maritime services.
