Land filling kag site development sa Culasi National High School, yara na sa 50%

Padayon ang land filling kag site development sa bakante nga lote sa Culasi National High School sa Barangay Culasi, Roxas City para sa ginaplano nga pagtukod nga two-storey school building.

Sa interview sang Bombo Radyo kay Engr. Montini Hormigos sang City Engineer’s Office, iya ginpahayag nga yara na sa 50% ang natapos nga pagpatambak sang duta sa nasambit nga lugar.

Suno kay Hormigos, kinahanglan nga tambakan sang duta ang lugar bangud manubo ini kag nagakinahanglan nga mapataas kag mapatapan antes tukuran sang building.

Ang bag-o nga school building ang pagatukuron sang Department of Education (DepEd) agud makahatag sang mas maayo kag mas komportable nga palibot sa pagtuon sang nagadamo nga mga estudyante sang Culasi National High School.